Naibu Waziri wa Mawasiliano na Teknolojia ya Habari, Mhandisi Maryprisca Mahundi, amesema kuwa Lulu Saccos inaendelea kutimiza malengo ya serikali kwa kuboresha huduma kwa wanachama na kushirikiana na jamii. Akizungumza katika Maadhimisho ya 11 ya Lulu Saccos yaliyofanyika jijini Mbeya, Mahundi alisisitiza mafanikio ya chama, ikiwa ni pamoja na kuongezeka kwa wanachama hadi 499 na kufikia mtaji wa bilioni 17.
Mahundi alitoa pongezi kwa wanachama, bodi, na watumishi wa chama kwa juhudi zao za kuimarisha huduma za chama na kutoa msaada kwa jamii. Alisisitiza umuhimu wa elimu kwa wanachama, ikiwemo mafunzo kuhusu bima na uwekezaji, yatakayofanyika katika kipindi cha siku tatu.
Aidha, aliwataka wanachama kuhakikisha wanarejesha mikopo kwa wakati na kuongeza akiba ili kuchangia ukuaji wa mtaji wa chama. Aliahidi kuwa serikali itaendelea kutoa msaada na elimu kwa vyama vya ushirika kwa kushirikiana na wizara husika.
Mwisho, Mahundi alimpongeza Rais Dkt. Samia Suluhu Hassan kwa juhudi zake za kuimarisha mazingira ya kukuza vyama vya ushirika nchini.
