MKUU wa Mkoa wa Mbeya, Beno Malisa, amesema kuna umuhimu mkubwa wa kuwathamini zaidi wataalamu wa afya wanaohudumia watoto wachanga wanaozaliwa kabla ya muda wao (njiti), kutokana na mazingira magumu na changamoto wanazokabiliana nazo katika utoaji wa huduma hizo.
Malisa aliyasema hayo Oktoba 17, 2025, wakati wa ufunguzi wa ukarabati wa wodi ya watoto wachanga (Neonatal Care Unit – NCU) katika Hospitali ya Wazazi Meta, ukarabati uliotekelezwa na Taasisi ya Afya Ifakara (Ifakara Health Institute – IHI) kwa ushirikiano na wadau wa NEST360 Tanzania.
“Kwa wachache tuliobahatika kuona hali ya wodi hii, imenijengea hofu na kunifanya nione thamani ya maisha kwa undani zaidi. Tunapaswa kuwathamini wataalamu hawa kwa moyo mkubwa, kwani wanahudumia watoto katika mazingira magumu yanayohitaji upendo na uvumilivu mkubwa,” alisema Malisa.
Akiipongeza Taasisi ya Ifakara na wadau wa NEST360 kwa juhudi za kuboresha miundombinu ya afya, Malisa alisisitiza kuwa vifaa vilivyotolewa vitumike ipasavyo kwa manufaa ya Watanzania, hususan wananchi wa Mkoa wa Mbeya.
“Nawashukuru wadau wetu kwa uzalendo wao. Serikali ya Awamu ya Sita imeweka msingi imara wa miundombinu ya afya, na juhudi hizi za wadau ni mwendelezo wa jitihada hizo. Nikiwa Mkuu wa Mkoa, nitaendelea kushiriki kwa vitendo — kila mwaka nitanunua kitanda kimoja kwa ajili ya watoto njiti chenye thamani ya Sh12 milioni,” alisema.
Aidha, Mkuu huyo wa Mkoa aliwataka wadau wengine kuunga mkono jitihada za serikali katika kuboresha sekta ya afya, hasa kwenye wilaya tano za Mkoa wa Mbeya, ili kuhakikisha miundombinu ya hospitali inaimarishwa na maisha ya watoto wachanga yanaokolewa.
Kwa upande wake, Mkurugenzi Mkuu wa Taasisi ya Ifakara, Dkt. Honorant Masanja, alisema mpango wa NEST360 ulianza kutekelezwa mwaka 2019 hadi 2023 katika awamu ya kwanza, ukiwahusisha hospitali saba ikiwemo Hospitali ya Rufaa Kanda ya Mbeya.
“Kuanzia mwaka 2024 tumeanza awamu ya pili ya mpango huu, ambapo Hospitali za Rufaa za Mkoa wa Mbeya na Makandana zimeongezwa. Awamu hii inatarajiwa kukamilika mwaka 2028,” alisema Dk. Masanja.
Amefafanua kuwa mpango huo unalenga kuunga mkono juhudi za serikali kupunguza vifo vya watoto wachanga, ambapo kwa mujibu wa takwimu za Wizara ya Afya, mtoto mmoja hufariki kila baada ya dakika 10 nchini.
“Asilimia 80 ya vifo hivi vinaweza kuzuilika endapo kutakuwepo na wahudumu wa afya wenye ujuzi wa kutosha, vifaa tiba vya kisasa na mazingira rafiki ya utoaji huduma,” aliongeza.
Naye Mkurugenzi wa Hospitali ya Rufaa ya Kanda ya Nyanda za Juu Kusini, Dkt. Godlove Mbwanji, alisema serikali imefanya kazi kubwa kuboresha sekta ya afya, lakini bado inahitaji ushirikiano wa wadau.
“Tumeona hali halisi kwenye wodi hii ya watoto wachanga — inahitaji uwekezaji mkubwa katika vifaa, rasilimali watu na miundombinu. Ni lazima taasisi binafsi na wananchi wajitokeze kusaidia, kwani hawa watoto wadogo ndiyo taifa la kesho,” alisema Dkt. Mbwanji.
