Na. Mwandishi wetu
Uboreshaji wa Daftari la Kudumu la Wapiga
Kura mkoani Mara, Simiyu na baadhi ya halmashauri za mkoa wa Manyara utafanyika
kwa siku saba kuanzia kesho tarehe 04 hadi 10 Septemba, 2024 ambapo jumla ya
wapiga kura wapya 491,050 wanatarajiwa kuandikishwa.
Kwa mujibu wa makadirio yaliyofanywa na Tume
Huru ya Taifa ya Uchaguzi na ambayo yanatokana na takwimu za Sensa ya Watu na
Makazi ya Mwaka 2022, idadi ya wapiga kura 3,391,017 wanatarajiwa kuwemo kwenye
Daftari la Kudumumu la Wapiga Kura kwenye mikoa hiyo wakati wa uchaguzi mkuu wa
mwaka 2025.
Hata hivyo, kwa mujibu wa Mkurugenzi wa
Uchaguzi wa Tume Huru ya Taifa ya Uchaguzi, Bw. Kailima Ramadhan idadi hiyo
inaweza kuongezeka zaidi.
“Idadi hii inaweza kuongezeka kwa kuwa
inawezekana wapo watanzania ambao walikuwa na sifa za kuandikishwa kuwa wapiga
kura wakati wa uboreshaji wa Daftari mwaka 2019/20, lakini kwa sababu moja au
nyingine hawakuweza kujiandikisha kuwa wapiga kura,” amesema Bw. Kailima.
Kwenye uboreshaji huo wa Daftari jumla ya
vituo 4,373 vitatumika kuwaandikisha wapiga kura wapya na kuboresha taarifa za
wapiga kura walioandikishwa kwa miaka iliyopita.
Uboreshaji wa Daftari kwenye mikoa hiyo
unafanyika ikiwa ni mwendelezo wa zoezi hilo lililozinduliwa na Waziri Mkuu,
Kassim Majaliwa Majaliwa mkoani Kigoma tarehe 20 Julai, 2024 ambapo mzunguko wa
kwanza ulijumuisha mikoa ya Kigoma, Katavi na Tabora.
Baada ya uboreshaji kukamilika kwenye mikoa
hiyo ulifuata mzunguko wa pili kwenye mikoa ya Kagera na Geita na wa tatu
kwenye mikoa ya Mwanza na Shinyanga.
Mzunguko wa nne wa uboreshaji wa Daftari
unajumuisha mkoa wa Mara, baadhi ya halmashauri za Mkoa wa Manyara ambazo ni
Halmashauri ya Mji wa Babati na Halmashauri za Wilaya za Babati, Hanang na
Mbulu na mkoa wa Simiyu ambapo vituo vitakuwa vinafunguliwa kuanzia saa 2:00
asubuhi na kufungwa saa 12:00 jioni.
