Browsing: Video Mpya

Hospitali ya Rufaa ya Mloganzila (MZRH) imeadhimisha Siku ya Saratani Duniani kwa dhamira ya kuimarisha huduma za uchunguzi, matibabu, na uhamasishaji wa jamii kuhusu ugonjwa wa saratani. Kupitia mikakati madhubuti, hospitali hiyo inajikita katika kuboresha upatikanaji wa huduma za uchunguzi wa mapema, matibabu bora, na elimu kwa jamii ili kuongeza uelewa na kupunguza maambukizi ya saratani.

Katika maadhimisho hayo, wataalamu wa afya wamehimiza wananchi kufahamu dalili za awali za saratani, kufanya uchunguzi wa mara kwa mara, na kuzingatia mtindo bora wa maisha kama njia ya kujikinga na ugonjwa huo. MZRH imeendelea kuwa mstari wa mbele katika mapambano dhidi ya saratani kwa kuimarisha huduma zake za uchunguzi na matibabu, sambamba na kushirikiana na wadau mbalimbali katika sekta ya afya ili kuhakikisha huduma bora zinawafikia wananchi wote.

Kaulimbiu ya mwaka huu inaangazia umuhimu wa usawa katika upatikanaji wa huduma za afya kwa watu wote, huku MZRH ikidhamiria kuleta mabadiliko chanya katika sekta ya afya nchini.

#mbeyayetutv

Naibu Waziri wa Mawasiliano na Teknolojia ya Habari, Mhe. Maryprisca Mahundi, ametimiza ahadi yake kwa wanawake wa Wilaya ya Kyela kwa kukabidhi mtambo wa kuchakata dhahabu (Karasha) kwa Umoja wa Wanawake Tanzania (UWT) wilayani humo.

Akizungumza wakati wa hafla ya makabidhiano, Mhe. Mahundi alisisitiza dhamira yake ya kuwawezesha wanawake kiuchumi, akisema:
“Lazima tuhakikishe tunasimamia maono yetu. Mimi kama kiongozi, nina jukumu la kuhakikisha tunakua pamoja, hasa kundi kubwa la wanawake ambao nawaongoza.”

Aliongeza kuwa mtambo huo wa kuchakata dhahabu utasaidia kuinua uchumi wa wanawake wa Kyela kwa kuwaongezea fursa za kipato na maendeleo endelevu.

Mwenyekiti wa Umoja wa Wanawake Tanzania (UWT) wilayani Kyela, Bi Sesilia Mwakang’ata, alimpongeza Naibu Waziri Mahundi kwa juhudi zake za kuleta maendeleo kwa wanawake wa Mbeya.

“Tunamshukuru sana kwa kutupatia mradi huu wa kuchakata dhahabu. Ni hatua kubwa katika kutufanikisha kiuchumi na tunaupokea kwa mikono miwili,” alisema Bi Sesilia.

Mradi huu unatarajiwa kuongeza fursa za ajira kwa wanawake wa Kyela na kuboresha hali yao ya kiuchumi kupitia sekta ya madini.

#mbeyayetutv